Azken astean, Orioko Herri Ikastolako hezkuntza komunitateak bigarren urtez jarraian Laponiatik etorritako ikasle-talde bat jaso du, Erasmus+ proiektuaren barruan.
Ikasle horien bisitak bi kulturen arteko adiskidetasun loturak sendotzeaz gain, hezkuntza esperientzia aberasgarri bat eskaini die ikasleei. Astebeteko egonaldian, Laponiako ikasleak gure ikasleen etxeetan egon dira eta eguneroko bizitzan eta herriko kulturan murgiltzeko aukera izan dute.
Jardueraz betetako agenda batekin, gure ikasleek hainbat esperientziatan lagundu diete gonbidatuei: ikastola bisitatu, haren funtzionamendua ulertu, eta gure eskualdeko natura eta kultur eskaintza zoragarriaz gozatu.
Besteak beste, Donostiako Aquariuma bisitatu dute. Bertan, arrainak elikatu eta inguruko itsas biodibertsitatea ezagutzeko aukera izan dute, bai eta arrauna bezalako kirol jardueretan parte hartzeko aukera ere izan dute. Gainera, Arturo Elosegi biologoak hitzaldi bat eskaini die eta bertan mundu mailan dugun biodibertsitate-krisi larria aztertu dute.
Egonaldiaren azken egunean, ikasleek aukera izan dute bi herrialdeetako bizitzaren antzekotasunei eta desberdintasunei buruz hausnartzeko, eta, horrela, kulturen arteko ulermena aberasteko eta elkarrizketa eta elkar ulertzea sustatzeko.
Esperientzia hau funtsezkoa izan da bi hezkuntza-komunitateen arteko kultura-trukea eta elkarrekiko ikaskuntza sustatzeko, eta berretsi egin du Orioko Herri Ikastolak hezkuntzaren internazionalizazioarekin eta kultura-aniztasunaren sustapenarekin duen konpromisoa.